A photo of a person squeezing his belly fat

Paliitin Ang Bilbil (Tiyan): Anong Gagawin?

By Dr. Liza Ramoso-Ong

Marami sa atin ang may problema sa lumalaking bilbil, lalo na kapag nagkakaedad. Kung overweight o kulang ka sa ehersisyo ay puwede din lumaki ang bilbil. Ano ang ating magagawa para mapaliit ito?

Heto ang ilang payo para lumiit ang bilbil:

  1. Uminom ng isang basong tubig bago kumain. Nakabubusog ang tubig at mas kaunti ang iyong makakakain.
  2. Kumain ng mas madalas pero kaunti lamang. Ang isang saging o mansanas ay puwedeng pang-meryenda na.
  3. Bawasan ang pagkain ng kanin. Kung dati-rati ay 2 tasang kanin, gawin na lang 1 tasang kanin.
  4. Kumain ng mas mabagal. Kapag mabagal ka kumain, mas mararamdaman mo ang pagkabusog at mababawasan ang iyong makakain.
  5. Mag-ehersisyo ng 3 hanggang 5 beses kada lingo. Subukang mag-aerobic exercise ng 30 minutos hanggang isang oras.
  6. Palakasin ang masel sa tiyan. Mag-aral ng mga ehersisyo para lumakas ang tiyan, tulad ng stomach crunches.
  7. Magkaroon ng tamang tindig (posture). Huwag maging kuba sa pag-upo at pagtayo.
  8. Umiwas sa matatamis na inumin tulad ng soft drinks, iced tea at juices. Nakatataba ito at nakadaragdag sa laki ng bilbil.
  9. Kumain ng almusal araw-araw. Kapag hindi ka nag-almusal, mas gugutumin ka pag dating ng tanghalian at mapaparami ang iyong makakain.
  10. Bawasan ang pag-inom ng alak at beer.
  11. Bawasan ang pagkain ng maaalat. Ang asin at alat ay nagdudulot ng pagmamanas ng katawan.
  12. Kumain ng 2 tasang gulay at 2 tasang prutas araw-araw. Umiwas sa matataba at mamantikang pagkain.
  13. Maglakad ng madalas at umakyat ng 1 o 2 palapag ng hagdanan.
  14. Bawasan ang stress at matulog ng sapat.
  15. Maging masipag. Ituloy lang ang mabuting pamumuhay at regular na ehersisyo para hindi lumaki ang bilbil.

Related Posts