By Dr. Liza Ramoso-Ong
May mga kaso kaming nakita na na-“murder” ang kuko ng customer ng isang manikurista. Nasugatan at nagkaroon ng malalang impeksyon sa daliri ng paa.
Ayon sa isang pagsusuri sa America, may 50% ng mga salon ang gumagamit ng kontaminadong kagamitan pang-pedicure at manicure. May bacteria na natagpuan sa kanilang mga nail clippers, nail file, at tubig na pinangbababad sa kuko.
Paano tayo iiwas sa impeksyon? Sundin ang mga payong ito:
- Pumunta lamang sa mga malinis na salon o manikurista na sa tingin mo ay masinop mag-trabaho.
- Ibabad ang mga gamit (tulad ng nail clippers at iba pa) sa 70% rubbing alcohol sa loob ng 20 minutos. Gawin ito bago gamitin sa panibagong customer.
- Kailangan maghugas maigi ng kamay ang manikurista at customer bago magsimula.
- Mag-dahan-dahan lang. Kapag may sakit na naramdaman, ang ibig sabihin ay nagkasugat na at puwede itong magdulot ng impeksyon. Lagyan agad ng alcohol o povidone iodine ang sugat.
- Kung ikaw ay may diabetes, namamanhid ang paa o na-stroke, ang payo namin ay huwag na lang magpa-pedicure. May problema sa ugat (nerves) ang mga diabetic at puwedeng hindi maghilom ang sugat nila sa paa. Baka maputol pa ang paa kapag kumalat ang impeksyon.
- Mag-ingat sa paghila ng mga “hangnail” o iyung mga balat sa tabi ng kuko. Ang paghila at pagkasugat nito ang pinanggagalingan ng impeksyon sa daliri.
Gumamit ng Povidone Iodine tulad ng nabanggit ko sa nakaraang artikulo.
